ԻՆՉ Է ՀԻՓՈԹԵՔԱՅԻՆ ՎԱՐԿԸ

Եթե ձեզ բնակարան գնելու համար գումար է անհրաժեշտ և չունեք բավարար չափով խնայողություններ, ապա դուք կարող եք  դիմել և ստանալ հիփոթեքային վարկ բանկից կամ վարկային կազմակերպությունից:

Հիփոթեքի կանոն 30/3․  Հիփոթեքի ամսական մարումը չի գերազանցում ձեր ամսական եկամտի 30%-ը: Տան գինը ավելի ցածր է, քան ձեր տարեկան եկամտի եռապատիկը:

Մինչ հիփոթեքային վարկ վերցնելը ուսումնասիրեք արդյոք բանկից կամ վարկային կազմակերպությունից չեն առաջարկում հիփոթեքային վարկի տրամադրման հատուկ ծրագրեր, որոնք կարող են ձեզ վերաբերել: 

Օրինակ․՝
Երիտասարդ ընտանիքների համար ներկայումս գործում է «Բնակարան երիտասարդներին» ծրագիրը: Ծրագրի նպատակն է պետական աջակցություն ցուցաբերել բնակարանային պայմանների բարելավման կարիք ունեցող երիտասարդ ընտանիքներին: Ծրագրի շրջանակներում բանկերը և վարկային կազմակերպությունները երիտասարդ ընտանիքներին տրամադրում են վարկեր` բնակարան ձեռք բերելու նպատակով, իսկ պետությունը վարկի մարման գործընթացում ֆինանսական աջակցություն է ցուցաբերում վարկառուին:
Հիփոթեքային վարկի դեպքում որպես կանոն խոսքը գնում է մեծ գումարների մասին:

Հիփոթեքային վարկը գրեթե միշտ երկարաժամկետ և խոշոր գործարք է։

Այդ իսկ պատճառով հիփոթեքային վարկը օժտված է որոշակի առանձնահատկություններով: Դրանք են`

• Բանկերը և վարկային կազմակերպություններրը հիփոթեքային վարկի դիմաց պահանջում են գրավի առարկա:
• Գրեթե միշտ պահանջում է գրավ դրվող գույքի ապահովագրում` վարկային պայմանագրի ամբողջ ընթացքում:  Որոշ դեպքերում վարկատու կազմակերպությունները պահանջում են նաև վարկառուների և/կամ համավարկառուների (օրինակ` ամուսիններ) դժբախտ պատահարից, մահացության և/կամ մշտական անաշխատունակության ռիսկերի ապահովագրություն:
• Քանի որ, ինչպես արդեն նշել ենք, հիփոթեքային վարկը խոշոր և երկարաժամկետ գործարք է, վարկատու կազմակերպությունները պահանջում են, որպեսզի դուք ևս միանվագ կերպով կանխավճարի տեսքով մասնակցեք բնակարանի ձեռքբերման ֆինանսավորմանը:

Կանխավճարը հանդիսանում է այն ներդրումը, որով դուք մասնակցում եք այդ ներդրմանը, որը սովորաբար կատարվում է գործարքի կնքման ժամանակ: Կանխավճարը կազմում է գույքի արժեքի 20-30%։