ԻՆՉԻՆ ՈՒՇԱԴԻՐ ԼԻՆԵԼ ՀԻՓՈԹԵՔԱՅԻՆ ՎԱՐԿ ՎԵՐՑՆԵԼԻՍ

Դիմե՛ք վարկատու(այն անձը,որը տրամադրում է վարկ) կազմակերպությանը: 

1․Վարկատու կազմակերպությունը ձեզ մանրամասն կբացատրի վարկավորման համար անհրաժեշտ գործընթացները, փաստաթղթերը, ծախսերը: Ճշտե՛ք ձեզ հուզող բոլոր հարցերը:

2․Բանկը կամ վարկային կազմակերպությունը ձեզ վարկ տրամադրելուց առաջ պետք է համոզված լինի, որ դուք ի վիճակի կլինեք վերադարձնել վերցված վարկը: Վարկատուն գնահատում է ձեր վարկունակությունը որպես կանոն հաշվի առնելով`

• Ձեր և ձեր ընտանիքի եկամուտները:
• Ձեր կուտակած միջոցները և խնայողությունները:
• Ձեր վարկային պատմությունը:

3․Որպեսզի վարկատուն ձեզ վարկ տրամադրելու որոշում կայացնի, նախևառաջ  պետք է վարկատուին ներկայացնեք վարկը ստանալու համար պահանջվող փաստաթղթերը և լրացնեք վարկային հայտը:

4․Փաստաթղթերն ամբողջությամբ ներկայացնելուց հետո` վարկատուի կողմից սահմանված ժամկետում, սկսվում է վարկավորման գործընթացը, որը ներառում է.

• գրավի, առքուվաճառքի պայմանագրերի կնքում և նոտարական վավերացում,
• անշարժ գույքի կադաստրի տարածքային բաժանմունքից սեփականության և գրավի գրանցման վկայականների ստացում,
• գրավադրվող գույքի և վարկառուի դժբախտ դեպքերից ապահովագրություն, որը վարկառուի ժամանակավոր կամ մշտական անաշխատունակության դեպքում փոխհատուցում է վարկի մարումը (եթե առկա է ապահովագրության պահանջ):
• Այնուհետև բանկի համապատասխան աշխատակիցը պատրաստում է վարկային, հիփոթեքի և առքուվաճառքի պայմանագրերը:

Մինչ պայմանագիր կնքելը ուշադիր և մանրամասն կարդացե՛ք պայմանագրում նշված բոլոր կետերը:

Որպես կանոն, պայմանագիրը կնքվում է 2 օրինակից: Չմոռանաք ստորագրելուց հետո վերցնել կնքված ու ստորագրված պայմանագրի ձեր օրինակը: