ԻՆՉՊԵՍ ԿԱՏԱՐԵԼ ՓՈԽԱՆՑՈՒՄՆԵՐ
Դրամական փոխանցումը հնարավորություն է տալիս կատարելու միջոցների փոխանցումներ բանկային, փոստային համակարգի և փոխանցումներ իրականացնող կազմակերպությունների օգնությամբ:
Դրամական փոխանցումներ հնարավոր է կատարել տարբեր երկրներ և տարբեր արժույթներով:
Դրամական փոխանցումների համակարգի միջոցով դուք կարող եք գումար փոխանցել ՀՀ տարածքում և արտերկրում գտնվող ձեր մտերիմներին, հարազատներին, գործընկերներին, կազմակերպություններին և այլն:
Դրամական փոխանցումը հնարավոր է կատարել
- բանկային հաշվի միջոցով,
- առանց բանկային հաշվի բացման:
ԲԱՆԿԱՅԻՆ ՀԱՇՎԻ ՄԻՋՈՑՈՎ ԴՐԱՄԱԿԱՆ ՓՈԽԱՆՑՈՒՄ
Այս եղանակով դրամական փոխանցում կատարելու համար նախ պետք է բացել բանկային հաշիվ, որի մասին կարող եք կարդալ բանկային հաշիվ բաժնում:
Բանկային հաշվի միջոցով դրամական փոխանցում կատարելու համար պետք է՝
- նախապես ստուգել անհրաժեշտ սպասարկման վճարների,
- միջնորդավճարների առկայությունը,
- դիմել ձեզ սպասարկող բանկին,
- ներկայացնել անձը հաստատող փաստաթուղթ,
- համապատասխան աշխատակցին հայտնել գումարը ստացողի տվյալները (օրինակ` անուն, ազգանուն, հասցե և այլն), գումարը ստացողի հաշվեհամարը (առկայության դեպքում), գումարը ստացողի բանկի անվանումը և փոխանցվող գումարի չափը,
- պարզել, թե որքան ժամանակում կկատարվի փոխանցումը,
- hայտնել ստացողին փոխանցված գումարի չափը, ինչպես նաև այդ գումարից գանձվող սպասարկման վճարների չափը (առկայության դեպքում):
Բանկը ձեր բանկային հաշվից կարող է փոխանցում իրականացնել միայն ձեր կամ ձեր կողմից լիազորված անձի հանձնարարականով:
ՀՀ տարածքում բանկային հաշվով փոխանցումը կատարվում է առավելագույնը 3 աշխատանքային օրվա ընթացքում: Արտասահման փոխանցում իրականացնելու ժամկետը կախված է այն բանկերի թվից, որոնց միջոցով կատարվում է փոխանցումը:
ԲԱՆԿԱՅԻՆ ՀԱՇՎՈՎ ԴՐԱՄԱԿԱՆ ՓՈԽԱՆՑՄԱՆ ՍՏԱՑՈՒՄ
- ներկայացե՛ք ձեզ սպասարկող բանկ,
- համապատասխան աշխատակցին ներկայացրե՛ք անձը հաստատող փաստաթուղթ,
- հայտնե՛ք աշխատակցին ձեր բանկային հաշվի համարը,
- ստուգե՛ք՝ արդյոք ձեր բանկային հաշվին փոխանցված գումարի չափը համապատասխանու՞մ է փոխանցողի կողմից նշված գումարին,
- պահանջե՛ք անհրաժեշտ գումարը՝ ձեր բանկային հաշվում առկա միջոցների սահմաններում:
ԱՌԱՆՑ ԲԱՆԿԱՅԻՆ ՀԱՇՎԻ ԲԱՑՄԱՆ ԴՐԱՄԱԿԱՆ ՓՈԽԱՆՑՈՒՄ
- դիմե՛ք փոխանցումներ իրականացնող կազմակերպությանը,
- պարզե՛ք, թե դրամական փոխանցումների իրականացման որ համակարգով է կատարվելու փոխանցումը,
- տեղեկացե՛ք, թե որքան ժամանակում կկատարվի փոխանցումը,
- ճշտե՛ք, թե որքան է դրամական փոխանցման համար սահմանված սպասարկման վճարը, այսինքն` որքան եք վճարելու փոխանցումը իրականացնելու համար, որքան գումար է գանձվելու փոխանցումը ստացողից,
- փոխանցվող գումարը և սպասարկման վճարը մուծե՛ք դրամարկղում,
- դրամական միջոցը ստացողին հայտնե՛ք փոխանցվող գումարի չափը (առանց սպասարկման վճարների), փոխանցման «ստուգողական» համարը և այն համակարգի անունը, որով կատարվել է փոխանցումը:
«Ստուգողական» համարը փոխանցումներ իրականացնող կազմակերպության կողմից տրվում է ձեզ, որը դուք պետք է հայտնեք գումարը ստացողին:
«Ստուգողական» համարը անհրաժեշտ է, որպեսզի բանկը հավաստիանա, որ գումարը ստացողը հենց այն անձն է, ում փոխանցվել է գումարը:
ԱՌԱՆՑ ԲԱՆԿԱՅԻՆ ՀԱՇՎԻ ԲԱՑՄԱՆ ԴՐԱՄԱԿԱՆ ՓՈԽԱՆՑՄԱՆ ՍՏԱՑՈՒՄ
- եթե փոխանցողը նշել է որոշակի կազմակերպություն, ներկայացե՛ք փոխանցողի կողմից նշված հասցեով փոխանցման կետ,
- եթե փոխանցողը չի նշել որևէ կազմակերպություն, փոխանցողից պարզե՛ք, թե որ համակարգով է կատարվել փոխանցումը, ճշտե՛ք, թե որ կազմակերպություններն են իրականացնում տվյալ համակարգով փոխանցումներ և ներկայացե՛ք համապատասխան կազմակերպություն,
- համապատասխան աշխատակցին ներկայացրե՛ք անձը հաստատող փաստաթուղթ,
- աշխատակցին հայտնե՛ք այն համակարգի անվանումը, որով իրականացվել է փոխանցումը,
- աշխատակցին ներկայացրե՛ք ուղարկողի հայտնած փոխանցման «ստուգողական» համարը, եթե փոխանցումը կատարվել է առանց բանկային հաշվի բացման,
- համապատասխան աշխատակցից վերցրե՛ք փոխանցումը ստանալու հայտը: Ստուգե՛ք, թե ստացվելիք գումարի չափը համապատասխանում է արդյոք փոխանցողի կողմից նշված գումարին,
- եթե վերը նշված պայմաններն անթերի կատարվել են, ստորագրե՛ք և ստացե՛ք գումարը:
-
2023-07-01Այստեղ կծանոթանաք կանխիկ փողի, բանկային հաշվի, վճարային քարտիշ էլեկտրոնային փողի մասինՏեսնել ավելին
-
2023-07-01Այստեղ կծանոթանաք, թե ում պետք է դիմել վճարումներ, փոխանցումներ կատարելու համարՏեսնել ավելին
-
-