ՖՈՆԴԻ ԵՎ ՖՈՆԴԻ ԿԱՌԱՎԱՐՉԻ ԸՆՏՐՈՒԹՅՈՒՆԸ ԵՎ ՉԸՆՏՐԵԼՈՒ ՀԵՏԵՎԱՆՔՆԵՐԸ

Ինչպես ընտրել ֆոնդ և կառավարիչ

Դա կարող եք անել 2 եղանակով. 

1. Թղթային՝ այցելելով հաշվի օպերատորներից որևէ մեկին: 
2. Էլեկտրոնային՝ epension.am կայքի Իմ հաշիվը էջի միջոցով: 

ՀԱՇՎԻ ՕՊԵՐԱՏՈՐԻ ՄԻՋՈՑՈՎ

Քայլ 1.

• Անհրաժեշտ է այցելել հաշվի օպերատորներից  որևէ մեկին: 

Քայլ 2. Այցելելիս անհրաժեշտ է ունենալ՝

• նույնականացման քարտ (ID քարտ) կամ անձնագիր, 
• հանրային ծառայությունների համարանիշ (սոցիալական քարտ),
• իսկ վերջինս չունենալու դեպքում՝ հանրային ծառայության համարանիշ չունենալու մասին տեղեկանք:

Քայլ 3.

• Տեղում լրացնել Պարտադիր կենսաթոշակային ֆոնդ և ֆոնդի կառավարիչ ընտրելու դիմումը:

Ի դեպ, այս դիմում կարող եք ներկայացնել նաև, երբ ցանկանում եք փոխել նախկինում ընտրված պարտադիր կենսաթոշակային ֆոնդը և ձեր օգտին կատարվող հետագա կուտակային հատկացումներն ուղղել նույն կամ նոր կենսաթոշակային ֆոնդի: Իմացեք ավելին ինչպես փոխել ֆոնդը և կառավարչին:

Մեր երկրում գործում են 2 կենսաթոշակային ֆոնդի կառավարիչներ, որոնցից յուրաքանչյուրը կառավարում է 3 տեսակի կենսաթոշակային ֆոնդ:

ԻՄ ՀԱՇԻՎԸ ՕՆԼԱՅՆ ՀԱՐԹԱԿԻ ՄԻՋՈՑՈՎ

Այս հարթակում կարող եք կառավարել ձեր կուտակային կենսաթոշակը: 

Քայլ 1. Մուտք գործեք Իմ հաշիվը հարթակը: Դրա համար ձեզ անհրաժեշտ է

• նույնականացման քարտ (ID քարտ),
• նույնականացման քարտը կարդացող սարք,
• ակտիվացված PIN և PUK ծածկագրեր:

Ի դեպ, նույնականացման քարտը կարդացող սարքը անհատական չէ. դրանից միևնույն ժամանակ կարող են օգտվել մի քանի անձիք: 

Քայլ 2. 

Հարթակ մուտք գործելուց հետո կատարեք հետևյալ գործողությունները.

1. Նույնականացման քարտը կարդացող սարքը միացրեք համակարգչին և սարքի մեջ տեղադրեք նույնականացման քարտը:
2. Սեղմեք Նույնականացման քարտ կոճակը:
3. Մուտքագրեք Պին ծածկագիրը , որը տրամադրվում է նույնականացման քարտի հետ:
4. Հաստատեք նույնականացման գործընթացի ընթացքում հայտնվող հաղորդագրությունը:
5. Իմ դիմումներ բաժնից ընտրեք Պարտադիր կենսաթոշակային ֆոնդի և կենսաթոշակային ֆոնդի կառավարչի ընտրության դիմումը և լրացրեք այն:
6. Ուշադիր եղեք, բացված պատուհանի առաջին` Ընտրված կենսաթոշակային ֆոնդիկառավարիչ պատուհանը բացելու դեպքում կտեսնեք կառավարիչների կողմից առաջարկվող միայն պահպանողական ֆոնդերը: Եթե չեք ցանկանում ընտրել պահպանողական ֆոնդ, ապա մի լրացրեք առաջին վանդակը և միանգամից անցեք երկրորդին` Ընտրված կենսաթոշակային ֆոնդ. այստեղ ներկայացված են առաջարկվող բոլոր ֆոնդերի տեսակները` կառավարիչների անուններով:
7. Ֆոնդի տեսակը ընտրելուց հետո միայն սեղմեք Պահպանել կոճակը, այլապես, եթե ընտրություն չեք կատարում, համակարգը պատահականության սկզբունքով ձեր համար ընտրում է կառավարիչներից որևէ մեկի պահպանողական ֆոնդը: Իմացեք ավելին  Ինչ կլինի եթե ֆոնդ կամ կառավարիչ չընտրեմ:
8. Այնուհետև դիմումը ևս մեկ անգամ ստուգելուց հետո սեղմեք Ընդունել կոճակը: 

ՈՎ ԿԱՐՈՂ Է ԿԱՄԱՎՈՐ ՄԻԱՆԱԼ

Կուտակային համակարգին կարող է կամավոր միանալ ցանկացած մարդ:

Համակարգը նման դեպքերում սահմանում է մի շարք արտոնություններ.

Եթե 40-50 տարեկան (1964 թ-ից հետո ծնված) աշխատողը կամավորության սկզբունքով միանում է կուտակային կենսաթոշակային համակարգին, ապա պետությունը նրա օգտին ևս կատարում է հատկացում՝ յուրաքանչյուր ամիս 7,5%-ի չափով:

Այս դեպքում մասնակիցը թոշակի անցնելիս, ի լրումն պետական կենսաթոշակի (հիմնական և աշխատանքային կենսաթոշակ), կստանա նաև կուտակային կենսաթոշակը:

Այդ հնարավորությունից կարելի է օգտվել, եթե կուտակային կենսաթոշակային համակարգին միանան մինչև 2018 թ-ի հուլիսի 1-ը: 

ԻՆՉ ԿԼԻՆԻ, ԵԹԵ ՉԸՆՏՐԵՄ ՖՈՆԴ ԵՎ ՖՈՆԴԻ ԿԱՌԱՎԱՐԻՉ

Երբ ինչ-ինչ պատճառներով չեք ընտրում ֆոնդ (օրինակ՝ չեք կողմնորոշվում), դա խնդիր չէ, քանի որ ձեր փոխարեն համակարգը պատահականության սկզբունքով կընտրի երկու կառավարիչներից մեկի միջին ռիսկայնության ֆոնդը (պահպանողական):

Հիշե՛ք, որ ցանկացած պահի դուք ինքնուրույն կարող եք փոխել թե՛ կառավարչին, թե՛ ֆոնդը: