ԹՈՇԱԿԻ ՍՏԱՑՈՒՄ

ԵՐԲ ԿԱՐՈՂ ԵՄ ՍՏԱՆԱԼ ԹՈՇԱԿ

Կուտակային կենսաթոշակի մասնակիցը իր թոշակը կարող է ստանալ 63 տարեկանից: Դրա համար պետք է ներկայացնել դիմում, ինչպես ֆոնդ/ֆոնդի կառավարչի ընտրության դեպքում էր:

Մինչև 63 տարեկանը թոշակը կարելի է ստանալ, եթե՝

• 55 տարեկանում կուտակվել են բավարար միջոցներ (մոտ 20 մլն դրամ):
• Մարդն անբուժելի հիվանդ է:
• Ճանաչվել է աշխատանքային գործունեությամբ զբաղվելու կարողության երրորդ աստիճանի սահմանափակում ունեցող հաշմանդամ:
• Վերադառնում է իր մշտական բնակության երկիր, եթե ՀՀ-ում աշխատող օտարերկրացի է:

 ԹՈՇԱԿԸ ՍՏԱՆԱԼՈՒ ԻՆՉ ՁԵՎԵՐ ԿԱՆ

• Միանվագ: Այս դեպքում ձեր կուտակումներն ամբողջությամբ և միանվագ վճարվում են ձեզ:
• Անուիտետի ձեւով: Երբ ձեր կուտակումները փոխանցվում են ապահովագրական ընկերությանը, որը ձեզ ցմահ վճարում է թոշակ:
• Ծրագրային վճար: Այս դեպքում ձեր կուտակումները կառավարիչը ձեզ վճարվում է կյանքի սպասվող միջին տևողության ամբողջ ընթացքում (այն հիմա 12 տարի է):

Թոշակի ստացման ձևը կախված է կուտակումների չափից, 63 -ից հետո կյանքի սպասվող միջին տեւողությունից և պետության կողմից սահմանվող հիմնական կենսաթոշակի (նպաստի) չափից (այն հիմա 16 000 դրամ է):

Այժմ պարզենք, թե որ դեպքում ինչպես եք թոշակ ստանալու. 63-ից թոշակի անցնելիս ձեր կենսաթոշակային հաշվում եղած կուտակումների մեծությունը հավասարաչափ բաժանվում է կյանքի սպասվող միջին տևողության ամիսների վրա (այն հիմա 12 տարի է) .

 1. Եթե ստացված գումարի մեծությունը փոքր է կամ հավասար հիմնական կենսաթոշակի 75%-ին, ապա ձեր կենսաթոշակը կարող եք ստանալ միանվագ, ծրագրային վճարի կամ անուիտետի ձևով:

 2. Եթե ստացված գումարի մեծությունը մեծ է հիմնական կենսաթոշակի 75%-ից, բայց փոքր կամ հավասար հիմնական կենսաթոշակի հնգապատիկին, ապա ձեր կենսաթոշակը ստանում եք միայն անուիտետի ձևով:

  3. Եթե ստացված գումարի մեծությունը մեծ է հիմնական կենսաթոշակի հնգապատիկից, ապա 

1. կենսաթոշակը տրամադրվում է անուիտետի ձեվով, կամ
2. հիմնական կենսաթոշակի հնգապատիկը տրամադրվում է անուիտետի ձեվով, իսկ հիմնական կենսաթոշակի հնգապատիկը գերազանցող մասը կարող է տրամադրվել միանվագ, ծրագրային կամ անուիտետի ձևով: